Mi rapèl in n’afèr dann tan apré la gèr 39-45. Mon papa té in plantèr é mi rapèl in romark li la fé dovan moin kan li la vi plizyèr baba fig koupé, é parèy pou in paké kèr kane. Donk li la di - é son kozman té déstiné lo volèr-li la di : akoz i travaye pa plito ké manz n’inport kosa lé mèm pa ou…

Lo tan la pasé é in zour in moun bien l’amenn amoin dann in réstoran é li la ofèr amoin manz in rougaye baba fig. Li la di amoin an plis : sa lé shèr mé sa lé bon ! L’èr-la, mon mémoir la artourn plis trant-an an aryèr, é moin la konm rovi mon papa dovan moin épi dé-troi réjime fig in pé masakré. Moin la pans dann mon kèr, manzé la mizèr i dovien in « pla »pou d’moun bien.

Lo tan i pass, lo bann valèr i shanj é sak téi vo pa arien yèr, zordi i mont an grad. Ala koman mi oi l é shoz !