Oté

« Brède yèr, sé roti pou domin »

In kozman pou la rout

Justin / 6 avril 2020

JPEG - 43.6 ko

Mésyé, Médam, La Sosyété, koz èk moin sé koz èk in kouyon mé sé o pyé d’lo mir k’i oi lo bon mason. Ala in kozman, sanm pou moin i vé di omoins dé zafèr : promyé zafèr sa i vé dir manzé nou la manz lontan, koméla sa i vien in nouritir roshèrché. Konm égzanp ni pé done kari baba fig, sansa brède mourong, sansa ankor rougaye kèr d’sonz. Figir azot in zour moin la rant dann in réstoran é in ga nou lété ansanm la komand brède mourong avèk sardine an boite : lo cavyar bann pov d’apré sak lo réstoratèr la di anou. Sa sé lo promyé zafèr, mél o dézyèm lé pa si kouyon ké sa pars li vé dir ou i fé lékonomi zordi pou gonf out pla domin é sa lé bien vré osi. Sé in l’invitasyon pou fé zékonomi, pou ou, é pou out zanfan pou aranz out kotidien dann l’avnir. Alé ! Mi kite azot rofléshi la dsi é ni artrouv pli d’van. Sipétadyé.