Médame zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami in brilèr sé zamé in moune rokomandab dann noute lang kréol La Rényon. In brilèr i pé bril in kantité d’zafèr : si wi bril pilon wi déménaz souvan é lo pli souvan san pèye loiyé. in brilèr d’parol sé in moune i réspèk pa la parol doné é brilèr d’payass sète-la alon rofléshi in pé é nou va oir, assiréman, kossa sa i vé dir.

Payass sé lo matla ranpli avèk la paye :wi roul ali la zourné, wi déroul ali lo soir. Kossa i fé dsi la payass mi domande azot an mil ! kossa lo brilèr i pé anprofité, mi domande azot galamn ké néna in rapor avèk la payass.

La plipar d’tan sé in promèss maryaz lé pa réspékté par la suite sinploman, pou ariv lo rézilta ké wi vé avèk lo l’intanssion brilé o dépar. Sépa si zot i rapèl lo léspréssion : « Mi manz zoi mé mi dor pa dan la plime » ébin mézami sé lo mèm zafèr ké noute kozman zordi.

Alé ! Mi kite azot rofléshi la dsi é ni artrouv pli d’van. Sipétadyé.