Oté

« Brinzèl amèr, sa i vol pa sa ! »

In kozman pou la rout

Justin / 29 séptanm 2018

JPEG - 43.6 ko

Bann volèr, si mi tronp pa, i yèm trap kékshoz i ral azot-dizon zot la anvi d’sa. La pa ké zot la bézoin, mé i paré sa lé pli for ké zot : in fors in kontrolab i pran azot. Biensir ni parl brinjèl mé la pa arienk sa ; koméla i vol téléfone portab, moto, zoutiy pèrféksyoné ; pa uin vélo kasé ! Pa in moto i pète pi ! Pa in téléfone la vite la fine vol an zékla. Antansyon, mi arète la pars sak mi di la pa vré toultan : i ariv la fain i fé sort lo lou dann boi. Donk la pa l’anvi solman, dé foi sé lo bézoin : bézoin manzé, bézoin paradé, bézoin fé plis anvi ké pityé. Konm i di dann lo shanté volèr kanar : "La sézon shipé !". Koméla na pi d’sézon d’apré sak i paré ; i ship tout l’ané, zour konm nuit, nuite konm zour. Shak foi lo moun la pèrd son kékshoz, sa i fé mal ali. Mi koné in boug, in foi, li té kontan kan demoun la vol son shapo pars li té i yèm pa shapo-la é li l’avé fé tout pou pèrd sa, san réisir é in zour, délivré, son shapo té pi la. Kontantman dsi li mé oila pa zandarm i’ariv dovan son port pou di ali : "La rotrouv out shapo !". Lo boug té pa o zanz ditou li la di mèrsi, mé zandarm la trouv té in drol mèrsi pars dabitid demoun lé kontan ; so kou isi non... Alé ! Mi kite azot rofléshi la dsi é ni artrouv pli d’van. Sipétadyé !