Oté
Bruny la parti l’ot koté la vi : Bonpé rényoné nora souvnans son bann konba pou nout libérasyon !
/ 14 séptanm 2020
Mézami moin té apré rogard zoinal parlé midi édmi kan l’anons la mor Bruny Payet la tonbé, an dé fraz épi in pti poigné d’sogond. Ni sort aprann la mor Bruny Payet, lo lansien sogrétèr la CGTR, li l’avé 98 zané.. I fo dir dsi lintèrnèt moin la pa trouv gran-shoz non pli… Mésak mi romark sé ké bann télé ofisyèl i koné pa sak i apèl in dosyé d’prèss, par konsékan i koné pa lo pasé d’in gran om... Romark, so kou isi l’anonsé é noré pi pa anonsé ditou. Fitintan lété konmsa.
Mézami moin té apré rogard zoinal parlé midi édmi kan l’anons la mor Bruny Payet la tonbé, an dé fraz épi in pti poigné d’sogond. Ni sort aprann la mor Bruny Payet, lo lansien sogrétèr la CGTR, li l’avé 98 zané.. I fo dir dsi lintèrnèt moin la pa trouv gran-shoz non pli… Mésak mi romark sé ké bann télé ofisyèl i koné pa sak i apèl in dosyé d’prèss, par konsékan i koné pa lo pasé d’in gran om... Romark, so kou isi l’anonsé é noré pi pa anonsé ditou. Fitintan lété konmsa.
- Lors de la création du PCR en 1959, Bruny Payet, Gervais Barret, Paul Vergès, Léon Feix, Pierre Rossolin et Léonide Laude.
Kosa banna noré pi dir ? Noré pi parl son nésans La ri vyèr Sin-Lui épi dir sak lété rar lontan, in pti kréol la dékrosh in diplôme linjényèr éléktrisien(mèm dë d’apré sak i paré). Noré pi dir osi li l’angaj dan la rézistans fransèz épi li la sèrv dann marine. Noré pi dir ankor li lété militan kominis, li la okip plizyèr post zélu, noré pi dir par égzanp li lété in konpagnon dan la lite avèk Paul Vergès épi Laurence Vèrgès. Noré pi dir ankor in bonpé zafèr konm li l’amenn la lite kont la frod éléktoral dann in tan sa téi karsèr nout péi konm in kansèr antisosyal.
Zot noré pi di ankor di li la travaye konm diréktèr zoinal Témoignages é pou sa la zistis kolonyal la sézi son bann mèb épi la mète a l’ankan. Biensir noré fali parl lo rol nout zoinal dann lédikasyon popilèr é pétète sa nora korsh la boush in pé… Pétète noré pi rakont koman la rokal ali dann in domann d’anploi konm ingényèr dann l’opital Bèlpyèr.. Pars li lé té tro diplomé, tro kalifyé pou fé sa. Sa osi lété La Rényon néo kolonyal… San zène azot zot noré pi dir li la vanj pou lotonomi La Rényon in bon koup de tan é mèm dèrnyé tan li téi di amoin konmsa : lo sèl lanaliz zist dsi la sistyasion La Rényon sé l’ané 1959 ké lo fitir parti kominis La fé kan li t’apré prépar son kongré.
I pouré ankor parl son rol dann la CGTR pou briz lo shène bann travayèr rényoné… Noré pi dir in ta d’zafèr a sho san atann domin épi di dé mo dsi son vizyon nout péi dann loséan indien. Mé téi parl pa d’li, l’avé pa bézoin parl dé li épi parl son rol dann dévlopman La Rényon dann nout tan... Mézami, mon bann dalon, Bruny la parti l’ot koté. Bruny ni dira pa zamé asé son rol dann la lite nout pèp rényoné. Alé ! Alé koté ou i sava, bonpé rényoné nora souvnans out bann konba.
