Si ni rapèl bien kossa la spassé ni koné Langlétèr la dévide lo bannzil Chagos par rapor in popilassion né dann Shagos é k’téi domann in sèl soz sé d’rèss dann zot péi d’néssans. Sa la éspass néna sinkantan é dopi dann tan-la bann shagossien lé an lite pou zot droi d’rotourn shé zot é la zamé rononss zot droi épi zot lintanssion.

Mon bann zami zot i rapèl sirman koman lo gouvèrnman GB-dann tan-la madam Thérésa May lété promyé miniss — apré son promèss la déssid final de konte rofiz-lo rotour banna shé zot kont in some larjan ridikil é bann shagossien la anvoye azot baladé.

Zot néna sirman dann in koin zot mémoi lo prossé la éspass laba La Haye dann Péi-Ba dovan in gran tribinal la désside kondane langlétèr pou in dékolonizassion « inachevé »épi an finn kont lo mové trètman bann shagossien la sibi-pou nou sa sé in krime kont l’imanité é sa i kontinyé dopi lo tan mwin la di azot an-o la.

Finalman Langlétèr la négossyé avèk Maurice. In négossyassion la diré, la diré pou finir par tonm dakor dsi in trété k’i rann lo bannzil Maurice. Biensir lé pa satisfézan mé lété in pa an avan. Toulmoune la tonm dakor : La Répiblik Maurice, Langlétèr, Zétazini par la boush son Prézidan Trump. Bann chagossien mèm si sé in lakor di possib pou zot

Apré Trump i shanj lopinion pars li la gingn in kou d’boi dsi son Mizo pou lo péi i apèl Lo Groenland. Alor li di so kou issi rann Chagos lil Maurice sé in stipidité épi bann konsèrvatèr GB i fé toute pou anpèsh ratifyé lo trété sé pou sa k’i tourn an ron — sé pou sa k’i oi pal o boute l’afèr. sé pou sa ossi lo krime kont limanité i kontinyé.in zour sansa in ot i fo arété épi réparé.

A bon antandèr salu !

Justin