Épi l’ote viktime in krime kont limanité sé lo pèp chagossien déporté dann moriss épi dann Sésèl pou pèrmète k’i konstrui la baz Diégo-Garcia. Mé san plézanté : bann chagossien i bataye dopi pliss sinkantan pou k’i vann zot péi natal !!!.Akoz in pé i sa pa zoué kanète ?

Arzout èk sa rienk an mèr sa i roprézant sissan sinkante mil kilomète karé donk talèr lo tyèr léspass marin i rovien Maurice. In gouvèrnman i fé sa , dizon li rode son mor politik é mi oi pa in gouvèrnman morisien aksèp in sotiz konm sa.

An pliss ké sa linkroiyab prézidan la pa di si sé li k’i ashète lo bannzil sansa sé zétazini pars avèk li i fo atann aou a tout zafèr konm Gaza li téi vé transform an sité balnéèr- in rivyéra li la di- é i kontinyé tyé laba mé sé konmsi arien létédéfandi pou in pé.

Mé atanssion, si in zour baton i shanj de boute, si lo vinkèr lété pi lo mèm ; é sa i pé arivé : laba dann Vietnam la grann amérik la gingn in sakré kou d’ rèss trankil,laba dann l’Irak lo vinkèr lé pa sak in pé i kroi, L’Iran la pankor pèrde la guèr-la,Kanada la kant mèm anvoye ali baladé, Danemarck ossi si mi tronp pa pou lo téritoie i apèl Groenland..

Antouléka mwin lépa chagossien, mé si mwin lété mi arètré pa vanjé pou k’i rann mon pèp son droi pou lo rotour dann péi natal é si mwin lété gouvèrnman Maurice mwin noré di non pou lo suisside domandé…pou la stipidité propozé-é pou ropran in formil nout dalon olivier Bancoult mwinn noré di : sé in konba rant po d’fèr é po d’tèr mé i ariv lo po d’tèr i gagn é sé sak ni kroi .Nou lé pa pliss nou lé pa mwin réspèkt anou.

A bon antandèr salu !

Justin