Paradi pèrdu ? OIla k’mi domande dann mon kèr kossa lété paradi-la pou bande zansien, kossa zordi ankor sa i roprézante pou zot — in bonpé lé fine mor an égzil, apré an avoir siporte linsiportab. Mi antan zot i di, zordi ankor kan la nostalji i pran azot, zot i fonde an larm kan zot i panss zot vi gashé… mé léspoir shoviyé o kèr, touzour léspoir pou rotourné.

Astèr mi panss ossi toute bande shagossien dézyèm, troizyèm zénérassion. Kossa i lé pou zot lo paradi pèrdu ? Mwin lé sir in pé i doi dir nou néna in péi éstraordinèr mé nou na poin lo droi pou alé. Ni pouré amenn inn bone vi laba, avèk noute natir éstraordinèr, noute kiltir, nout mizik, noute danss épi toute kalité bon produi noute natir i ofèr anou..

Ni rèv noute poisson bande zansien la anparl anou, noute tortu, noute langoust, Ni rèv krab ziraf ni oi noute foré koko.. mé pou l’instan ni krash dsi la mizèr, ni vomi dsi légzil, dsi l’éloignman. Ni modi la drog épi la prostitission. Kèl malédikssion Mon Dyé ségnèr la tonb déssi nou. Kossa nou la fé kissa pou amen sinkantan an dégréné konmsa. Kansa ni sava poz lo poin final déyèr toussa ? Tanto ? Ok, mé lo tan i pass dousman. Ni modi noute bande torssyonèr ziska la sétyème zénérassion.

Mézami zot péi lé magnifik. I tarde pa l’èr pou zot rotrouv ali ; i tarde pa l’èr pou mète ali bien an valèr. La pa pou rien bande zansien la sobate konmsa. La sobate pou zot pèp é zordi mi panss i tarde pa zot toute ansanb zot i sava fé ronète in nouvo paradi.

A bon antandèr, salu !

Justin