Mé i fo dir lo lépidémi i ède pa bien bann pouvoir piblik avèk son fassonn d’fèr-kaziman son vilin manyèr. In légzanpe ? Néna dé troi somenn lépidémi dann tan-la té apré trape son pik-antouléka sé sak téi di anou dann télé. Mwin la romarké l’avé prèss poin lo mor.Dopi dé somenn lépidémi i arkil in pé : in bon sign mé wala, li fé pliss lo mor : lété 2, épi 3, astèr l’apré étidyé lo ka in vintène pèrsone la fine pass l’ote koté d’la vi.

Alor, sa i vé dir omoinss néna malade, opliss néna lo mor ? Mi éspèr mwin la pa bien konpri sak i di dann télé mé mwin l’apré suiv banna. Pou mwin bien kalkil azot. Mé si mi tronpe, mi pé dir mwin lé pa lo sèl é kan mi ékoute la radio mi trouv kréol néna bonpé limazinassion. Inn la di li kroi pa sé moustik i amenn la maladi-la. In n’ote i trouv néna in kantité moutike é li panss sa sé dé moustik largué par avion osinonsa par drone é sa sé topète- morette.

Anfin la mazinassion lé o pouvoir shé nou La Rényon-si lé pa lo mazigador- é mi trouv sa i kontante amwin in pé.Konm bann pouvoir piblik i kontante amwin par zot fassonn d’fèr. Dèrnyé nouvèl mwin la antann ! Si lo vakssin lé pa bon pou le moune faye alon aplike ali dsi bann moune plito bien é alon lèss bann sak lé faye san vakssin konmsa omwinss sar pa vakssin va tyé azot.

Mi arète terla zordi pars talèr in pé va kroir mi prépar in lantré dsi Radio fridom lo karantyèm anivèrsèr é lé pa lo ka. Antouléka bravo pouvoir piblik ! Mi oi zot lé bon kissoi pou siklone, kissoi pou lépidémi é mi panss si néna d’ote kalité tablatir i tonb dsi nou, mwin lé sirésèrtin bann pouvoir piblik lé ankor kapab fé la prèv par nèf zot kapassité, zot invantivité, zot pouvoir pou étone anou ankor.

A bon antandèr salu !