Kan mi di sa mi panss lo vakssin pou atake lo chikoungounia é la fasson bann zofissyèl , miniss, prézidan é konpagni la inpoz anou in vakssin, nou téi koné pa vréman dann kèl parkour nou téi angaj anou- mi yèmrè dir dann kèl traka sa téi sava mète anou vyeu konm jenn, malade konm an bone santé. Mi rokoné kréol la trène lo pyé pou alé vakssiné malgré toute la piblissité téi fé é mi diré orozman..

Mé o fète bann rényoné l’avé rézon pars nou la vi l’avé bann risk lété mal kalkilé.Si tèlman néna poin lontan mwin la fé in pti modékri pou dir chikoungounia ou lé danjéré-si tèlman o mwinss néna bann malad opliss néna dmoune dann la mortalité. Dopi dé troi zour l’apré diskite rante janss bien pou konète si in moune lé mor par rapor son vakssinassion… Sansa lé mor pou d’ote rézon mèm si li la vakssiné.

Laba dann la franss la fine dir son mortalité lé lié avèk lo vakssin.Donk pou nou sa i vé dir lo vakssin la tyé ali… Mé oila mi sorte antann dann la radio in ote son é sète ote son sé : lié avèk la vakssinassion i vé pa dir sé lo vakssin la provok son mortalité… Biensir bonpé rante nou i gnor la sibtilité lo kokabilèr franssé kan li parl la santé. Pou nou si lé lié, sa i vé dir sé pars li la vakssiné ké li la pass l’ote koté.

Mé pétète nou lé dan lérèr é wala noute rézoneman : si lo ga l’avé pa vakssiné li nora té mor, li nora té pa mor ? Biensir pèrsone i pé pa rotourn an aryèr pou dir sa mé sak lé sir sé k’i ranfors pa la konfyanss demoune dann lo vakssin mé pou mwin i ansèrv de rien zoué dsi lé mo avèk nou, roul anou dan la farine avèk lo ranfor lo diksyonèr Larousse la médssine.

A bon antandèr salu !