L’avé in foi dann in kartyé la vil Médéllin (i fo prononsMédéline) in gran léspas demoun l’avé bati in gran bidonvil pou éskiv la guèr sivil. 17 mil pèrsone téi viv la é afors-afors konm l’avé poin in sistèm pou kolèkt bann déshé, landroi la vni in gran montagn zordir, demoun téi apèl sa « in katastrof piblik ».

Rant 1977 épi 1984. Demoun la sov l’androi zot téi viv pou alé fé in kaz provizoir dann kartyé Medellin. Mé ni gouvèrnman, ni la komine, la pa roganiz ramasaz déshé é firamézir landroi la vni in gran bidonvil é sa ziska bann zané 1980. L’èrla la popikasyon la roganiz aèl pou fé roviv son landroi : in gran zardin partazé avèk plis sinkant mil plant la pran la plass lo bidonvil… 70 % lo kartyé la vni in gran zardin partazé rant bann rézidan lo kartyé.

Bann madam té lo vré motèr lo shanjman avèk zot kopérativ, zot travaye organizé é tout in rézo komèrsyal pou ékoul la marshandiz. Zordi partou bann plant i pouss é lo bann rézidan la trouv in manyèr pou amélyor zot rosours. La vi ékonomik la roganizé, la vi kiltirèl galman, in rézo pou la santé. Biensir la mizèr la pa disparèt konplètman, mé landroi lé pli vivab zordi avèk son plizyèr dizène mil abitan.