Lo cyclotron* la fine trouv son plas la-ba dann téknopol komine Sin-ni. Sa napoin in bonpé dsi la tèr : par-la sète-uit konmsa. Sa in nafèr va rann bien sèrvis bann malad La Rénion épi toute sak i sort nout rézion loséan indien. Akoz sa i ansèrv pou suiv bann kansèr : kan ou gingn sa épi apré kan i fo suiv koman li évolié. Bann malad sar pa tro loin z’ot famy, va gingn agard azot in pé.
Bien sir, sa la pa ariv konmsa d’in kou, èk la blag sinpléman. Nana lontan l’apré prépar sak i fo pou akèy ali : son plas, son fabrikasion la-ba dann in péi i apèl La Suède, tousa larzan li koute, tousa démarsh..
Épi in mashine, sa i marsh pa tousèl ; i fo dmoun pou antouré. Ni koné Maya césari, in konséyèr rézional, i suiv sa do pré. Prézidan linivèrsité la vni ésplik koman tousala l’arivé. Dé marmay La Rénion - mi di marmay par laz, mé kroi pa zot lé pa kalifié in ! zot lé pliské ! - i sava travay la-dsi.
Alors kan in nafèr lé pa bon, i fo di la pa bon ! Mé kan in nafèr i mète La Rénion anlèr, i fo di galman.

Justin

* si zot i vé bien konprann lo zafèr, épi tout sak i ansèrv,alé dsi “temoignages.re” ép i tap “cyclotron” dann bann mo-klé