Ni rapèl koman Paul Vergès lété angajé dann dossyé-la avèk lo GIEK, mé ni rapèl galman koman sak néna la min-miz dsi linformassion issi La Rényon la fé toute sak i falé pou kashyète la vérité. Paul Vergès té i dirij lo Giek avèk a la klé in rapor toulézan, mé bann télé la zamé anparl de sa konmsi si sé Paul Vergès i anparl de sa, i fo pa di rien la dsi mèm si firamézir k’lo tan i pass firamézir la vérité i éklate é ni oi koman limanité lé pri dan l’arozoir.

Astèr ni antann in pé i di lé vré néna bann zakor d’ Paris mé kossa i fé si ni assossyé sansa ni assossyé pa konmsi bann gran Péi néna lo monopol pou lite konte lo dérègloman klimatik. In pé i di, tanpir si La franss i fé pa son par d’travaye pars fransh vérité i oi pa kossa èl i pouré fèr.Issi La Rényon in pé i di : « kouék ni sava fèr ladan avèk noute ptite grossèr ?Pou kossa ni pran anou don ? »

Pou mwin shakinn i doi fé son par dann travaye é mi rapèl in zistoir rakonté par Elie Hoarau dsi sak in minislkil zoizo- lo kolibri- téi fé dann in linssandi d ’foré : li téi plonj dann flèv épi li téi ramenn dé-troi goute delo pou larg dsi linssandi. Lé zot zanimo i di zoiz-la : « kossa wi fé a koté d’in gran linssandi konmsa ? Wi panss wi sava étinn dofé ou la ? »Lo zoizo i réponn : « Mi fé sak mi gingn é toute i doi fèr sak zot i gingn. ! »..L’èr-la bann gro zanimo la kalkil in kou é zot la mète a anvoye delo pou étinn dofé é l’ariv o bite…D’ète égzanplèr sa sé in n’afèr k’i sèrv kékshoz.

Sa i vé dir nou ossi La Rényon ni doi fé sak ni doi fé pou lite konte lo dérègloman klimatik é pou mète anou dann bann zakor d’Paris si ni ariv pa toussèl, mi panss légzanp ni pé doné va ansèrv kékshoz pou lo monde antyé.

A bon antandèr salu !