Dopi tan-la parti kominis la gingn plizyèr foi fé pass bande déssizyon pou shanj la vi demoune La Rényon mé dé foi nout band bon projé lété kalé par gouvèrnman La franss an konplissité avèk demoune la droite — mé pa solman — si tan tèlman ké plizyèr zané apré ni kour déyèr bande projé-la san gingn zamé ratrapé.

An parmi band projé mi antrevoi dë nou lé pa paré pou ratrapé : inn sé la MCUR in gran pa an avan pou la konéssans nout sivilizassion é nout listoir, l’ote sé lo tram-train.
Zistoman mi sorte gingn in méssaz i anons la — ba an franss dann départman z’yveslines, i sorte mète an sèrvis in tram-train in projé l’ané 2014 é zordi lé an sèrvis dsu 18 kilomète — in projé alstom apré ké li la rashète Lantropriz Bombardier — in lantropriz Kanada.

Par lo mèm okazyon, dann lo kominiké i anparl dévlopman tram-train in pé partou dan La Frans mé pa solman pars néna galman in projé dann L’Inde i paré la rouvèr dèrnyèrman… Antand amwin bien lé zami, mi vé pa trèss louanz lo kapitalist Alstom pars mi koné shak foi k’i fé in n’afèr konmsa sé band kapitalist i aroz azot é pa bande travayèr — poitan sé band travayèr k’i amène la plu-valu donk lo travaye finalman. Mi pans solman mon péi la bien bézoin band projé konmsa é sak nou la pèrde sar difissil pou argagné. Domaz pou nou, pou linstan ! Mi pans bande sabotèr toute dirékssyon i doizète kontan zot forfé. Zot mové travaye anti-parti kominis rényoné…anti-Vergès pétète.

A bon ékoutèr, salu !

Justin