Dann mon kozman pou la rout yèr, moin la mète an gard kont sak in moun i pé ékri. Par ébzanp yèr té dsi la koulèr noir. Zordi mi parl lo bénite, lo dyab é konpagni é sa osi sé in n’afèr a méfyé. Na d’moun la gingn la mor pou in n’afèr konmsa. I paré té i falé pa dir lo nom Bondyé dann désèrtènn rolijyon pars i apèl sa blasfème. Mé rozman, ziska zordi nou lé dann in sosyété ni pé dir tolérant. Mé laté pa toultan konmsa é in sinp votaz pou kominis té kapab fé modi aou. Fé mète aou an déor d’légliz... bon sa té d’yèr é lé pi d’koméla. Anplis, konm mon profésèr katéshis téi di, sé l’intansyon ki kont é kan ou la poin l’intansyon blasfémé é bin ou i blasfème pa , é pou artourn vite dosi nout kozman , sa i vé dir solman ou l’apré dmann l’inposib. Alé ! Mi kite azot rofléshi la dsi é ni artrouv pli d’van. Sipétadyé !