Oté

« Dabor ou lé mète out parol, épizapré out parol lé mète de ou »

In kozman pou la rout

Justin / 13 zwiyé 2018

JPEG - 43.6 ko

Ou lé mète dé out parol pars ou i pé di kékshoz sansa pa di ali. Donk ou i pé aval in parol sansa lèss ali sorti. Mé sé ou ki doi oir pars si ou i lèss aou sortir ou i koné pa son l’éfé pou l’avnir. Souvan dé foi mi antann demoun kozé émi domann, dann mon kèr, si lé bon dir sak zot i di sansa si i pé ète danzéré. Sirtou dann in péi toulmoun i koné toulmoun, sansa toulmoun lé famiy. Mé in foi ou la fine rouv out boush, in foi out parol lé fine libéré, na pi arien pou kal ali. So zour-la sé out parol i komann aou an bien konm an mal. Alé ! Mi kite azot rofléshi la dsi é ni artrouv pli d’van. Sipétadyé !