Boudikont, san fé antansyon ni abitié èk so shomaz la. Néna i prièr bon dié pou ka shak lanonss, lo rézilta i dovyin pli méyèr, minm si pou la ba déor, lo dérnyé shif i pé indik in léklérsi, lo rézilta partou, kiswa déor, kiswa isi, lo rézilta lé pa bon minm. Pétèt pou déor i pé rosanti inn ti léklérsi, gouvérman i di konmsa lo shomaz lé éstabilisé, mé i anpèsh pa désertin romèt an koz la manièr banna i bat lo kalkil. Sak lé sir, pou nou isi i kontini goumanté minm i aksélèr dan désertin séktèr i prétan.

Alorss koman i kalkil lo nonm shomèr ? La kantité d’moun i tir la lang ? Si i kont sak la zamé tavay, i trouv trwa million sinsan, si i kont sak la zamé travay èk sak la travay in pé, èk sak la bèk in klé isi-laba, la i trouv sin million sinsan, minm kan i kont drwat néna i di na pwin lo kont, pou bann zasosiation shomèr néna o mwin wuit milion an frans. Aprésa kont pa si banna pou di tout si shomaz, vik sa lé inportan, vik sé sa ki fé é ki défé zéléksyon. Lo prézidan li minm li promèt “kont pa si li pou prézant a li proshin zéléksyon si shomaz i bèss pa“.

Zot va di “Ankor in promèss san valèr“. La osi nou lé abitié, dopi lo tan. Lo prézidan i di konm sa, sé dann kouran lané 2016 ké lo shomaz va désann pou vréman, sé dann lané proshinn ké nou va war in bèss krédib, pou lo kou ni fé arpa li in prosé dintansyon, ni atann pou war. Pétèt li lir dann la mar kafé ousinon li lé in pé dovinèr, alé war ou èk banna. Pou mwin sora difisil, mi wa pa lo bout. Alorss, koman fé pou sort dann la fénwarsité shomaz ? Daborinn, abitié mé rézigné pa !