Pou kossa d’apré zot ? Dabor pars kan wi koné pa oussa wi sava, i fo konète oussa wi sorte é sanbe pou mwin nou lé bien dann in shéma konmsa… Dézyèmman ni pé dire lo rényoné i koné pa bien son listoir pars néna in bon boute tan i amontr pi listoir La Rényon dann lékol La Rényon. Mwin lé sir in marmaye dopi li rante matèrnel ziska li sorte avèk son bak-si li sorte avèk so bak-i pé fé toutin parkour pandan kinzan san antande parl listoir La Rényon.- pétète pa zéro kalbass, mé si tèlman pti pé.

Sré intéréssan fé in lankète pou konète si bande rényoné an mazorité i koné bande date inportan dann noute listoir, mi kroi pa la mazorité d’moune i koné sa bien, si zot lé kapab di dé-troi date san tronpé… An touléka si i koné pa, mwin lé sir i yèmré konète noute listoir san trikaz san révizyoniz listoir noute péi.

An gro zordi i pé di bande paran lé pour avèk pliss katrovin dis pour san, avèk vin poin anpliské lo dèrnyé sondaze. Lo bézoin lé la, l’anvi lé la, bande résponsab i doi réspèkt la volonté d’moune. Astère konm mwin la fine ékri na poin arien i anpèsh fé listoir La Rényon dann la lang kréol par noute lang lé kapabe anpar in n’afère konmsa san kass noute tète pou vréman.

Astère si ni vé rapèl troi rovandikassion, ni pé di :

Demoune dann zot mazorité i vé in l’ansègnman la lang kréol é lansègnman an kréol in pé oute matyère.

Bande paran i vé zot zanfan i sava lékol é i aprande dann bande klass biling kréol-franssé,

Bande rényoné i vé i aprande listoir La rényon épi la kiltir rényonèz ;

Lédikassyon nassional lé o pyé di mir é sé èl k’i doi mète an mizik so nouvo lansègnman dann noute péi La Rényon.