Mi pé dir azot noute parti la prézante son bann tèz épi son bann rovandikassion é an parmi lo rovandikassion lotonomi pou La Rényon. La majorité téi vé in riptir avèk lo kolonyalism épi la départmantalizassion si tèlman téi mète pa an plass vitman, é ké lo kolonyalism l’avé difikilté pou débarass la plass.

Sirésèrtin ké mèm si nou lété départman franssé dopi l’ané 1946, ni pé dir lo kolonyalism l’avé sorte par la porte épi l’avé rante par la fénète in sorte néo-kolonyalism avèk lo rosiklaz bann fon piblik an fon privé, l’égalité rofizé, épi la kréassion d’inn klass priviléjyée avèk in sur-rémunérassion.

Wala la késtyon mi yèmré poz azot :

D’apré zot dann kèl sistèm ni lé zordi ? Dann sistèm kapitalist, dann istèm kolonyalist osinonsa dann sistèm néokolonyalist… Mwin la déza antann in pé dir nou lé dann sistèm kapitalist, in poin sé tou. Pou d’ote lo pakt kolbèrtien avèk lésploitassion kolonyal lé ankor dann laktyalité. Pou d’ote ankor nou lé dann sistèm néokolonyalist, in sistèm bien kapab transform bann fon piblik an fon privé.

Na poin lontan in moune la di amwin ; dir toultan lo sistèm néokolonyalist, sa i énèrv ali pars pou li La Rényon lé dann sistèm kapitalist kom La franss épi d’ote landroi.

Ala mon késtyon : mi yèmré zot i di amwin si la kontradikssion prinssipal rante nou épi La franss sé in kontradikssion néokolonyal, sansa in kontradikssion kapitaliste, ou bien in kontradikssion kolonyal… Mi di azot sa, pars i fo ni diskite dsi lo réjime noute lékonomi pars konètein n’afèr konmsa sé mète an plass lo bann moiyin pou lite konte noute kontradikssion prinssipal é lo moiyin pou libèr anou dsa.

A bon antandèr salu !

Justin