Yèr matin, moin la bien ékout kamarad Maurice Gironcel dan son konférans dé près. Moin té fine antann sak li la mèt dan son program. Li la anparl lo soisant mézir François Hollande. Li la anparl galman lo trant mézir pou bann péi l’Outre-mèr épi lo kontra rant François Hollande épi Parti kominis rényoné. Sa moin té i koné, mé lé kant mèm bon antann ardi lé shoz, pars o moin, sak ou lé sir, sé ké lo kandida li kroi sak li di, li lé paré pou vanj pou sa, é li fé pa solman sanblan kroir… konm désèrtin.

Mé dan sak li la di, na in n’afèr nouvo la intérès amoin. Li la di, li va domann gouvèrnman in loi konmsa i ronons pa in prozé intérésan arienk pars sé in l’advèrsèr dan la politik la mèt sa anlèr. Lé vré, sé in n’afèr k’i mank, sinonsa bann démolisèr noré pa gingn fé déga konm zot la fé. La list lé long, é kan kamarad Maurice la anons tousala, nou lété blizé romark lo tor in pé la fé nout popilasyon késtyonn travay, késtyonn l’ékipman, késtyonn konfor, késtyonn modèrnité.

Lé vré lé ga ! Tram-trin, MCUR, Pol oséan, Zénith, sant notik, lipodrome, l’ékovil… tousa la kasé épi la pèy milyon pars la pa réspèk parol. I prétan dir, bann moun i rès dsi téritoir la CINOR té blizé pèy plis uit milyon l’éro pou l’dédi. Domin, si i kontinyé, si i gingn pa rotourn an aryèr, nou sar blizé pèy pou tram-trin, pars nou na, par la fot Didier Robert, in n’afèr d’loi dsi nout do... Bin, figuir azot, Maurice la di li va domann gouvèrnman fé in loi pou anpèsh in pé fé n’inport de koi sirtou kan l’arzan lé la, sirtou kan krédi lé la, kan li la fine fé.

Mi pans, l’èr l’arivé pou mèt i pé bann gazé a l’ord !

 Justin