Oté

« Dan blan, kèr noir »

In kozman pou la route

Justin / 22 avril 2021

JPEG - 43.6 ko

Mézami, Méssyé, Médame, la sosyété koze èk mwin sé koze èk in kouyon, mé sé o pyé d’lo mir k’i oi lo masson. Mézami mi panss zot i koné kozman-la, pars sa in kozman la Rényon. Kossa sa i vé dir oziss ? Sirman k’in zoli sourir i pé kashyète na dé foi in mové santiman. Mi panss zot i koné d’moun laparanss i korèspon pa avèk lo fon : in bon prézantasyon défoi i kashyète in mové fon… Landroi mwin l’arivé, mi komanss par ète méfyan. Pou kossa ? Pars san vouloir mi pé koz konm in rassist. Si lo blan sé in bon koulèr é lo noir in mové koulère zot i konpran demoun bronzé lé riskab d’ète véksé. Mi sorte lir dann in zoinal dann l’afrik laba, bann zavèg épi bann sour i protèst pars bann provèrb i abèss azot. Ki ki pé dir amwin si mon bann provèrb i abèss pa d’ote kalité d’moun : lo pti, lo gran, lo jone, lo noir, log ra, lo mègue épi d’ote ankor. Mi koné pa kossa zot i anpanss, mé mwin mi méfyé pangar mon band provèrbe i pé z’ète in lankourajman pou d’moun néna mové santiman. Alé ! Mi kite azot rofléshi la dsi é ni artrouv pli d’van. Sipétadyé.