Fransh vérité, sa in kozman mi aprésyé pa ditou. Dabor pars lo blan i pass pou in kalité, é lo noir i pass pou in défo. Pa promyèr foi mi di sa mé mi ardi ankor in kou : i di pa la mizèr noir ? I di pa travaye o noir ? Parl pi tout bann kozman lo noir lé mal vi dodan !

Astèr nout kozman, kosa li vé dir ? Li vé dir na désèrtin nana in l’aparans é lo l’aparans lé plito an z’ot favèr. Mé dann la réalité, z’ot vérité i tourn lo do avèk z’ot l’aparans. I diré zot sé d’bon moun é alé oir la pa vré. Dan blan, kèr noir ! Sa sé in vilin défo nout sosyété koméla.