Néna dé foi mi ékri in n’afèr épi mi dmann si demoun lé pa riskab d’ète véksé. In légzanp sé la koulèr la po d’moun : si ou i di « kèr noir » konm lé marké an-o la lé posib demoun lé riskab ète pa kontan ditou. In pé Lé riskab domann aou pou kosa ou i di pa « kèr blan », kosa bann noir la fé aou, toultan i koz dsi noir mèm ? Mi di pa kèr maron pars dann mon zidé, kèr maron sré plito konm ki diré in konpliman-alé maron, pou moin, sa sé la prèv ou i vé rézisté é la rézistans, solon moin, sa in kalité. An touléka, si ni arvir dsi nout kozman an-o la « kèr noir » la pa in konpliman ditou é pa arienk isi shé nou. Nou, nou la konète lésklavaz bann noir, nou la konète galman trafik bann moun l’afrik épi Madégaskar, épi nou la konète lo mépri pou lo mazorité d’moun kan l’avé lésklavaz épi la trète é mèm apré kant l’inn é l’ot lété fini. Alé ! Mi kita zot rofléshi la dsi é ni artrouv pli d’van. Sipétadyé !