Médam, Mésyé, La sosyété koz èk moin sé koz èk in kouyon mé sé o pyé d’lo mir k’i oi lo mason. Mé zami zot i koné la sosyété sé la sosyété é bonpé d’moun ou i trouv i fo ou lé pridan avèk zot. Pou kosa ? Pars lé pa si fasil ké sa konète z’ot l’intansyon. Pou kosa ? Désèrtin i pé an aoir bone zintansyon é d’ot i pé an avoir mové l’intansyon. Sa lé vré dopi ké lo mond sé lo mond é dopi l’om modèrn la aparète dsi la tèr. L’om modèrn lé danzéré. Sansa l’avé lontan li té fine disparète dsi la sirfas la tèr. Si zot i domann pou kosa demoun, in léspès si tèlman faye, si tèlman san défans, koman li la vnyabou alé partou é par milyar dsi la tèr, défyé bann bébète, é mèt zot vi dann danzé.koman li la fé sa ? Pou moin sé pars li la dékouvèr bonèr-bonèr li l’avé zami é li l’avé zènmi dsi la tèr é sa sé kékshoz i fo pa obliyé. Alé ! Mi kite azot rofléshi la dsi é ni artrouv pli d’van. Sipétadyé.