Zot i an souvyin lo minis Lurèl, sanm pou mwin té lo minis de loutromèr, ki té i roul in pé plis la kèss ke tout. Li minm la di konm sa, kann na pi lavnir, odrémié pran in pé nout distans èk kann. Li minm san pou mwin té dakor pou siprim lo RSA. Li minm lo papa lo panyé Lurèl swa-dizan pou Réyoné pèy mwin shèr, boudikont nou la pèy plis shèr é an plis argard pa kalité marshandiz té dan lo panyé. Konm nou li sort dann in départman loutromèr, mé li lé pa tro klèr èk nou.

Poukoué mi an parl a zot lo minis Lurel ? Lo minis Lurèl té kandida zéléksyon rézyonal an gwadloup é i prétan li la gingn in gro galo. Banna i di, kan li té minis sé in boug ki té i défann a fon la kèss son prozé pou l’outromèr. Son prozé ousinonsa lo prozé gouvérnman. Li sort èt sanksyoné la ba èk ban gwadloupéin. Mazinn in kou la ba osi gouvérman la promèt ? Konm nou isi, mazinn in kou pou travay la promèt, mazinn, konm nou banna i atann osi lo rézo féré.

Mi koné pa si pou banna la promèt a zot lo rézo féré konm pou nou, mé pou nou té konm si té fé. Mi an souvyin minm lo moman. Lo promié avril 2012, konm si té yèr. Pou kann osi li la pran in gran langazman, minm si Lurèl konm mi di la bon o, Lurèl té plito kont. Sanm pou mwin bann gwadloupéin la sanksyon Lurèl, mé mi pans osi dan lo votaz dimansh lo promié vizé té lo gouvérnman !