Mé so kou issi lé pa si pozitif ké sa, pars d’apré sak bann konséyé lété apré dir Lo Didier la lèss in sakré gro-galé dann finanss la réjyon. Mwin mi koné pa arien ladan, mé kan wi antan i fo provizyone pou in milyar l’éro pou ranbours in dète sa spé k’i ariv é final de konte kissa noute réjyon i doi sa ? A s’ki paré, ni doi sa lo groupman l’antropriz la fé la route litoral — antouléka lo boute la fine fé.

Mi rapèl, dann tan, kossa lé z’inn épi lé z’ot téi di : in pé ti kriye kass-kou pars parti konm té parti route — la va dépass lo pri programé — d’ote téi di : arète fé la bou avan la pli, arète fé pèr dmoun, va fini route-la san dépanss in sèl katsou an pliss ké sak lé konvni.

La vérité sé ké nou néna zordi in domi-route litoral é pétète l’ané 2028 v’ariv ashové. Pou kèl pri ? Lo pri d’dépar la fine dépassé, archi dépassé donk i fo l’éta i alonj in moné é i fo La Réjyon i alonz in moné èl na poin pou l’instan.

Dan sète afèr-la i pé di ankor in kou défin Paul Vergès téi oi klèr ; li téi oi klèr mé pou in pé lété fine ariv l’èr pou sassine lo père-i falé démontre lété possib oir pli klèr ké Paul é ké lo parti kominiss. Ala oussa ni lé zordi é sof in mirak inpossib, La Rényon lé riskab bite dsi bann difikilté riskab mète ali dann malizé.

A bon antandèr, salu !

Justin