Féklèr lété féklèr lo zour, fénoir lété fénoir la nuite é l’moune ladan ? dizon nou lété in pé konm zanimo sak i bouz kan néna lo zour épi sak i dor kan néna la nuite.

Toussa pou dir lakaz nou l’avé pwin frizidèr é si l’avé in rèst manzé té dann garde-manjé téi mète. L’avé si tèlman pé d’zafèr ké lo manjé si téi rèss téi mète ali dann garde-manzé. Dann livèr, ni pé dir lo rèss manzé téi konssèrv in boute tan, mé dann lété antanssion manzé-la i gate pa.

Mi oi ankor, dann mon mémoir lo pti mèb mon papa l’avé fé avèk konm protékssion dé pti porte avèk pti griyaz métalik pou anpèsh lo moush rantré. Mi rapèl bien tazantan lo matin téi fé dri shofé é sa téi garni bien nout lintèryèr.

Kan l’avé pi d’ri é pi d’mayi téi fé in préparassion ravaz : maniok, patate, sonz, épi d’ote shoz si l’avé.. L’avé touzour kékshoz pars nou la zamé soufèr la fain mé d’ote moune mi koné la soufèr la fain é pa arienk in foi dan l’ané.

Mi rapèl pi kansa noute garde-manzé la disparète mé mi panss sé la modèrnizassion la mète in frin avèk li é li la dislparète pars la famiye l’avé pi bézwin ali. Domaz la pa garde sa pars li l’avé akonpagn bann famiye in bonpé d’tan..

A bon antandèr salu !

Justin