Toute sak i suiv Zé dé Zil, kisoi dann radyo, dann télé, ou sinonsa dann zournal, lé blizé romark bann ésportif rényoné nana plito bon rézilta, mèm pliské bon kékfoi, dann in pé tout bann éspor. Kisa va anplégné ? Sirman pa sak i vé k’i mète La Rényon anlèr... Nana dé foi, ni pé pans lé domaz toute bann péi l’oséan Indien na poin bon kondisyon pou antréné, konm nout bann z’atlète nana isi, dan lo péi, épi la-ba dan la Frans kan zot i partisip bann shanpyona. Mi koné pa tro bien lé shoz, mé asiréman, ni pé mazine in bon koopérasyon rant nout bann péi sré in bon n’afèr pou nout tout... Touzour so l’idé d’kodévlopman, in bon l’idé pou nout tout an vérité, é pa arienk dan léspor.

Na dé foi, lé shoz i marsh pa bien konm ni voudré. Na dé foi, ni gingn in galo landroi ni atann pa. In légzanp : dann foutbal. Nou té i atann pa lékip Mayotte té i sar done anou in galo konmsa. Mé l’ariv konmsa épi i fo sinploman arpran in bon dépar ; Sak noré pa été in bon n’afèr, pou léspri ésportif, sé ké lékip La Rényon i déside pèrd pou élimine Madégaskar ! Zot i koné, san oir lo match, sé in n ’afèr la travèrs dan mon tète. Pou koué ? Pars moin la antann dir, lékip Madégaskar sé lo favori, é noré été intérésan k’in gro lékip i partisip pa lo group final. Lété lo ka si La Rényon i fé bate ali par Mayotte ! Mé, boudikont, moin la majine té i falé pa pans in n’afèr konmsa, té mal pans in n’afèr konmsa.

Pars lo réspé pou lo ladvèrsèr i komann aou, si ou lé pli for ké li, ou i bate son mayi. Sirtou fé pa sanblan lèss ali bate aou, pars pou li, lo viktoir noré in gou l’amèrtime ! Arzout èk sa, out prop siportèr té riskab ète an kolèr avèk ou, pran aou pou in manzèr volay delo... mé léspor la pa in syans égzak. Kan ou lé sir ou i gingn so kou isi, ou i pèrde, é dé foi, mé rarman, kan ou i pans ou lé batu d’avans, sé l’èr ou i gingn lo match. Dan tou lé ka, mé z’ami, i fo réspèk la moral ésportiv... boudikont, la moral tou-kour.

Justin