Oté

« Dann bon boi néna touzour fourmi »

In kozman pou la rout

Justin / 4 zwin 2020

JPEG - 43.6 ko

Mésyé, Médam, La sosyété koz èk moin sé koz èk in kouyon, mé sé o pyé d’lo mir k’i oi lo bon mason. Mézami zordi ni rèss dann Kamroun in koloni lansien tan té bann zalman. Astèr li parl bon boi : lé sir bon boi pou brilé. Asé tann, i pran d’fé asé fasilman, épi i dégaj la shalèr kan i bril épi i mète lo tan pou brilé. Si li lé pouri, néna zandète dodan, mé i kui pa bien manzé. Si li lé kosto, si i pé débite ali an paké d’boi konm i di sa, ébin i di néna fourmi dodan é tansyon pangar kan ou i sava ramass in paké d’boi ladan. Oté ! Fourmi i désann dann out linj, i dsann dann out shové, i pik for sirtou si sé fourmi manyok sansa fourmi do fé. Pityé oir aou ! Ou lé martirizé parl pa ! Konklizyon dann tousa : mové boi fourmi i yèm pa, bon boi ladan mèm li fé son vi. É konm nou lé dann in provèrb mi pans sa i vé dirin mové zafèr pèrsone i vé pa, in bon zafèr demoun i kour dsi. Alé ! Mi kite azot rofléshi la dsi é ni artrouv pli d’van. Sipétadyé.