Matant zélida la ékrir Justin :

Mon shèr nové, mon spès salté, rouj-de-fon dovan l’étèrnité zordi moin na in sinp késtyon pou poz bann rouj. Mi antan bien zot l’apré krétik mésyé Didier pars néna konm lanspèk par raport la rout litoral é d’apré zot-mé na d’ot galman i di sa !- tout lo résponsabilité i pèz dsi zépol mésyé Didier. L’èrla, ala késtyon moin l’apré poz amoin. Mi domann amoin si z’ot kontantman i pousré pa zot ziska z’ète kontan si tout lo projé i kapote… si sa lé vré, l’èrla zot i pé pi dir zot lé résponsab. Pou moin sré plito lo kontrèr. Sré inn foli si in n’afèr konmsa i arivé. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, i étone pa moin lir in kékshoz konmsa de out par. Pars d’apré ou nout parti, l’alyans, épi nout vyé kamarad Paul Vergès san konté in bonpé bann pèrsonalité la pa mète asé an gard Didier Robert épi son majorité dsi sak té i atann ali dann bout lo bout lo bout... Kan bann vré difikilté i arivré, kan zanbèk an pagaye nora komans kal son shomin. Pli prévni ké sa, mi pans na poin.

Sa la pa anpèsh ali bate dsi son l’éstoma, fé lo fyèr, konm k’i diré lo mal dind. A biensir, lé zot i koné pa arien néna arienk li épi son l’antouraj i koné bien lé shoz. Si tèlman k’i koné, mi oi la plito dékoné. Mon vyé matant ou i oi pa bann moun-la é zéro la gosh in shif lé parèye. Ou i oi pa banna l’apré amenn la réjyon an sharète shaviré. Si vi oi pa sé k’out vu la bésé.

Romark bien néna d’ot résponsab : si Annette l’avé pa fé bate l’alyans l’ané 2010 nou noré pi évite in kouyonad konmsa. Si bann sosyalis o pouvoir dopi 2012 l’avé égzèrs konm i fo z’ot pouvoir pou kontrolé sak i apèl z’ot l’ékspèrtiz téknik épi finansyé. Si l’erop l’avé pa anvoye in misyon bidon momandoné. Si l’ané 2015 Madam Huguette é mésyé Thierry l’avé pa done mésyé Didier in shèk an boi dann la kanpagn réjyonal kan zot la di zot na poin l’intansyon toush arien dann lo projé mésyé Didier, noré pa non pli ariv sak l’arivé.

A par k’sa, o bout, lo bout, lo bout, sé Didier épi son l’antouraz va port lo shapo é zot na intéré lo bor lé larz. Tok ! Pran sa pou ou !

NB Tank’a out blag dsi nout soidizan kontantman i vo myé mi fé mèm pa ka d’sa.