Ala in kozman si zot i vé bien lir ali i vé dir dé shoz. Isi ni koné néna d’moun atèr é néna demoun an l’èr. Moun a tèr la plipar d’tan li lé dominé é moun anlèr souvan dé foi sé bann dominèr. Lé posib in vèrs lé shoz sansa i gingn pa invèrs ali ? Dann l’internasyonal i di bin : « lo mond va shanj de baz : nou sé pa arien i fo ni vien tout. » . Dann la révolisyon fransèz té i di osi an parlann lo tyèrzéta : li sé arien, kosa li vé z’ète ? tout. Astèr alon rogard in réjime banane sé bann ti lé an-o é lo bann pli gran pli gro lé an ba. Agard in pyé papaye, sé lo mèm zafèr. Dann mon kozman pou la rout i di sinploman sak néna dann la natir sé lo pti lé an-o. In gouvèrnman konmsa lé posib d’apré zot ? Akoz pa. David la langète Golliath si mi tronp pa. Si mi tronp pa non pli la lite dé klass i doi amenn bann ti kolon pou gouvèrn lo mond. Ni oira pa sa, mé ni pè kant mèm rèv de sa . Alé ! mi invite azot pou rofléshi la dsi é ni artrouv pli d’van. Sipétadyé !