Oté

« Dann in dikisyon avèk in inbésil sé lo saj k’i abandone »

In kozman pou la rout

Justin / 27 mé 2019

JPEG - 43.6 ko

Mi souvien d’in kozman rényoné téi di konmsa : « I diskite pa avèk in kouyon, i done ali rézon. » A ! Sa lé sèryé di in n’afèr konmsa. Pou kosa ? Pars souvan dé foi demoun isi La Rényon konm partou, la lang la poin l’frin mé i ariv lo largimantasyon i fé tonm aou atèr : la lojik i ariv souvan a manké é lésplikasyon lé pa bazé dsi la konésans. Sak la antann dann radyo diskisyon dsi Shikoungounya i rapèl ankor, moin lé sir, lésplikasyon dsi maladi. Dizon shikoungounya sé in maladi konpliké mé tout sizé lé parèye : demoun i pran souvan dé foi ninport ékèl rago i kour dann l’opinyon épi i baz la dsi pou fé z’ot diskour. Moin pèrsonèl, sa i jène pa moin pars souvan dé foi la kouyonis lé pli komik ké bann diskour sèryé mé i fo dir, kék foi, i égzazèr in pé plis k’i fodré. In légzanp : volkan i bril bo vèr i bril pa boi sèk ! alé fé l’ésé ou va trouvé. In pti mousik I pé pa done in gran malady : kroi sa si ou i vé. Mi arète la, é mi kite azot rofléshi si zot i vé. Ni artrouv pli d’van. Sipétadyé !