Médam, zé méssyé, la sosyété, koze èk mwin sé koze avèk in kouyon, mé sé o pyé d’lo mir k’i oi lo vré masson. Mézami, mwin la trape pti fraz an-o la, dann in léktir mwin la fé par azar. Donk mi koné pa kissa la di, mé mi panss néna pou rofléshi la dsi. La vi mézami lé pa in n’afèr fasil. Problème pou réglé i mank pa. Souvan défoi ou néna poin lo karaktèr k’i fo pou règ azot sansa lo métode pou règlé i kol pa avèk out prinsip de vi - mi vé anparl la métode komando, èl néna son bann partizan mé la pa touzour lo rézilta lé la : sak i rante an bèf, i pé sorte an biftèk. Mé mi panss souvan défoi néna plizyèr shomin é inn mèm i amenn landroi wi vé alé, lé zot lé san z’issu. Lakèl ? Kèl klé dann trousso i détake baro ? Sèl solisyon i fo ésséyé, é malorozman si sé lo dèrnyé klé sak i komanss rouyé ké sé lo bon, lé possib ou la fine dékourajé. Alé ! Mi kite azot rofléshi la dsi é ni artrouv pli d’van. Sipétadyé.