Matant Zélida la ékrir Justin :
Mon shèr nové,
Soman nana in pé i èm fé l’intéréssan kan na in siklone oui ! La amontr dann télé in bann loto, inn déyèr l’ot konm la shène krapo apré sové. La mèm amontr in mèr, olèrk trankiliz son popilassion, l’apré fé pèr azot ! Té i di demoun konm de koi i fo sové ! Amène z’ot barda déssi lo toi loto ! Ala kaj pou mète z’ot zanimo... Alon koz sérié : siklone, sé siklone, i fo fé konm défin papa, klout la port, klout la fénète, tak baro. Zot na k’a domann kréol koman i fé, zot nora la solision. So réshofman lo klima la tèr l’apré fé shof in pé d’koko, plis k’i fo. Mé kroiyé-moi ! Bondié i doi pa ète kontan oir koman demoun la tonm dan la kouyonis konmsa !

Justin la réponn a èl :
Mon vié matant,
Moin la pa tro konpri pou kossa i fo tak baro. Akoz siklone i kri poin pèrsone don sa ? Anfin, matant, ou i kroi siklone la-ba, konm siklone issi, sa marmay-lékol ? Matant, lo van i souf d’inn fors lé pa kroiyab. Lam la mèr i ariv in otèr, parl pa ! Nana troi z’an, in siklone té i apèl Katrina la pass landroi ou la vi dann télé. Baya ! déga, déga, déga matant ! Bann pov la gingn lo kou pa pou grat lo gongon. Mé zordi ankor, la pa prann dispozission konm k’i fo. Alor, i préfèr fé kour dmoun plito k’fé sak i fo... dann kèr péi kapitalis !

Justin