Oté

Dann l’Amérik : O pyé d’lo mir i oi lo masson

Justin / 15 zanvié 2021

JPEG - 43.6 ko

Mi sort lir dann zournal prézidan Trump la fé mark Cuba dsi la list bann péi i pran parti pou bann téroris. Moin la lir galman in lasosyasion umanitèr dann Yémen lé riskab ète dossi list-la avèk lo risk mète la famine dann 20 milyon d’moun dann nor Yémen. Momandoné in pé l’avé la krintiv li téi anvoye son l’avyasion pou bonbard l’Iran. Alon pa o bliy galman li la fé sort son péi dannan déor bann zakor d’ Paris – in lakor i asava dann sans la lite kont lo dérègloman klimatik. Donald trump la désid sa alé oir li sort pèrd zéléksyon dann moi d’ novanm é li sar ranplassé par in n’ot prézidan i apèl jo Biden.

Ala sak in prézidan dsi la finissyon son manda lé kapab fèr dann in péi in pé i konsidèr konm lo pli gran péi démoktatik. Dabitid, dann in ka konmsa, lo prézidan dsi la finisyon son manda lé la rienk pou prépar la tranzission rant son manda épi sète lo nouvo prézidan i sava rantré.

Lo 20 zanvyé, Trump nora pèrd son pouvoir d’nuizans, li sar ranplassé par in n’ot prézidan souvan dé foi la kritik son pozission. Alor kossa i sava spassé ? Mi di sa pars souvan défoi laltèrnans i amenn pa bann shanjman konm lopinyon i atann. Mi sava pa dir « Blan boné épi boné blan » mé prèsk. Konm mi pé dir pou laltèrnans konm la éspass dan La franss dsi in bann késtyon konm par égzanp lo fran Cfa, la sitèlman fé d’tor bann péi l’afrik soidizan indépandan.

Mé si ni arvien dsi la késtyon l’amérik : kossa lo nouvo l’administrasion l’amérik i sava fé ? Li va sèye éfass sak in prézidan danzéré la fé, sansa li varèss konmsa ? Alon atann pouoir mé konm i di : o pyé di mir i oi lo masson.