Tout sak la koni komine Lo Por na sinkantan par-la, na souvnans in lanvironman pa parèy ditou ké sète koméla. Près partou navé la savane ranpli zèrb sèk, la plipar d’tan jone, in pé vèr kan la plui l’avé déside tonm in kou. Tank’a bann kaz, zot lété la plipar d’tan kashète déyèr boi d’lé, a-par sak té i apèl la vil... in pti vil bien sir, par koté lo por épi dann pasaz lo trin. Dan la kroizé, épi dann boi d’lé, l’avé inn-dé pti komèrs. Lo shien mèg té i siyone partou. Koshon noir té i trafik mèm… konm in pé i di, sa té la vyann k’i marsh...

Koméla, tousa la bien shanjé. In pé partou na la modèrnité, komèrs an kantité, lékol lo gran konm lo pti... épi, konm in pé i apèl sa, léspas vèr in pé partou dépi la mèr ziska la finisyon la rivyèr dé Galé. In milyon sink san soisant mil mète karé la vèrdir, près karant mète karé par pèrsone avèk pyé d’boi par santène mil. Arzoute èk sa bann pépinyèr, l’inséktariome é in bonpé pti zardin dan la vil. Zardin, pyé d’boi, flèr, sa i fé pans anou toutsuit moush a myèl. La amontr sa dann télé, in lélvaz moush-a-myèl dann la vil.

Moush-a-myèl ? Ni koné sa lé an danzé, é i fo zot i kontinyé viv pou demoun an avoir bann frui, bann léguime, bann séréal, é bann plante osi… sinploman pou l’imanité pa disparète. Komine Lo Por la déside fé in n’afèr pou anpèsh moush-a-myèl disparète. Pou sa, èl la asosyé avèk plizyèr sosyété : in sindika i apèl Syndika apicol La Rényon, lo Konsèrvatoir botanik nasyonal, épi lo « Centre permanent pour l’environnement de Mascarin ». Pou fé kosa ? Pou sové épi pou dévlop la popilasyon moush-a-myèl. Sa in bon n’afèr, in n’afèr i mète komine Lo Por dann l’avan-gard pou défann la natir, konm touzour dépi 1971... Lo Por, sa mèm-mèm !

Justin