Matant Zélida la ékrir Justin

Mon shèr nové, mon spès salté, rouj-de-fon dovan l’étèrnité, i jène pa ou si mi parl èk ou la késtyonn lang ? Pars sak mi sava dir aou, moin lé sir, i sa pa fé plézir aou. Pou moin, isi La Rényon, nana in lang prinsipal i doi ranplas lé z’ot sé lo fransé. Biensir, mi koné demoun La Rényon i parl kréol rényoné an mazorité, mé sa la pa bon pou nou. Moin na in bonpé z’idé la dsi mé in réfléksyon i vien an promyé : sé la plas nana dann la tète in moun normal… Pou moin nana la plas dan la tèt, mé na poin in plas infini. Donk, sak lé myé, isi La Rényon sé ké lo fransé i pran près tout la plas ké nana dan nout tèt é ké ni pèrd pa nout tan pou bour lo krane avèk lo kréol rényoné dann l’ékol, mèm dan la famiy. La Tète la pa magazin farfouyé, alor i fo alé a l’ékonomi avèk èl, i fo ménaj la plas, i fo, konm di lo kont, in tète avèk bann réyon la konésans bien ranjé. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, mi pé dir aou moin lé pa dakor avèk ou… Dsi la késtyonn plas, i paré - é zordi demoun i koné - nana plis la plas ké nou téi pans, dann nout sèrvo pou ramas la konésans bien konm k’i fo. Donk out késtyonn plas i tienbo pa la rout. Arzout èk sa out késtyonn farfouyaz dan la tète sa galman sa i kol pa pars si in moun lé normal la konésans i pran son plas natirèlman dann son tèt è san dézord. In l’égzanp ? in marmaye lé an parmi d’moun : in pé i koz kréol rényoné, in pé i koz fransé, arzout ankor inn i parl an z’anglé. Vitman vitman la tète marmay-la I nyabou navig dann so tour d’babèl san difikilté

L’èr-la, afèr fé lo l’aprantisaz la lang an fransé épi an kréol rényoné é pa solman dann la lang fransé ? Pars i fo lo marmay i progrès osi dann la konésans avèk son lang de nésans épi dann la lang fransé. Konmsa li lé pli rish ké si li sava l’ékol arienk dann in sèl lang. Mé antansyon, pli rish si li nana in bone konsidérasyon pou son lang de nésans donk si lo moun li frékant nana in bon l’opinyon dsi son lang dé nésans a li. Pars la lang de nésans sé la lang lo kèr non ? Donk i fo done in bon plas pou la lang lo kèr lo z’anfan. Konmsa mi konpran la vi. Tok ! Pran sa pou ou.

NB. Si lo z’anfan nana in paran i koz fransé, in n’ot i koz kréol rényoné, Sa i vé dir li nana dé lang lo kèr é sa sé in bon n’afèr, in éstratézi gagnan - gagnan pou la vi, konm pou l’ékol.