Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
moin la bien suiv azot dann l’afèr dé zé dé z’il. Konm d’abtid zot la fé vni lo défansèr dé movèz koz. Pars soutienn Lé Komor konm zot la soutienn sa, forsé zot la atak la politik La Frans vi ké zot i di zot mèm ké lo minis la défann lo poinn vizé la Frans. Donk zot la pran lo poinn vizé dé l’étranzé kont sète nout prop péi. Donk mi san nana kékshoz l’apré titiye azot la dan. Nana kékshoz i fé ké ofiramézir ké la polimik téi gonf, zot té i pran plizanplis la distans par raport lo poinn vizé d’La Frans. Tout fason la vi la donn azot tor vi ké lo bann z’atlète épi lo piblik, zot la trouv la parad kan shakenn la shant son l’imn... Donk zot la donn rézon nout minis é sak té kont la artrouv azot la ké rant z’ot zanm. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr,
Mi apèrsoi, in foi ankor, ké ou na out prop fason lir l’aktyalité. Kan ou i di nou la pran lo poinn vizé l’étranzé kont lo poinn vizé d’La frans moin mi domann aou lo poinn vizé dé kèl Frans : La Frans k’i libér, sansa sète k’i domine é k’i domine ankor plis bann pli fèb.L’anprofitèr ? Sa ni èm pa.
Dézyèm poin, nou lé isi dann l’oséan indien é ni vé ni vé pa, nou sar blizé viv an solidarité avèk bann péi nout koté d’loséan indien. Nana lontan nou l’apré sèy raprosh de zot é oila k’in minis gro doi, i kass sak nou l’apré konstrui dopi dé z’ané é dé z’ané...
Kisa la gagné la dan ? Lo minis La Frans é lo préfé la pa gagné ditou zot la ! La prèv ? Si lo bann z’il l’avé pa sov lé zé-par z’ot volonté travay ansanm - lo zé lété fouti par dsi fouti, mor é antéré... Parl pi bann gèl do boi aprésa. Alor, la pa bézoin trik la vérité. La vérité sé sak tout demoun i koné, in poin sé tou. Tok ! Pran sa pou ou !