Yèr aprémidi, mwin té apré rogard télé. L’avé in paké sizé vidéo kolé inn avèk l’ote é an parmi, insizé dsi lo super ethanol. I paré sa lé a la mode koméla dann La franss : néna plizanpliss ponp mèm si na poin partou, épi in l’antropriz la fabrik in boityé pou pèrmète bann loto fonkstone avèk l’éssans roul avèk super éthanol, in konvèrtissèr si zot i vé-mi panss laba dan La franss karbiran i apèl lo E 85.

Mwin la pran lo tan agard in pé pars néna kéktan l’avé in gran polémik dsi luil - mi pans zot i koné sa déza - épi dsi l’éthanol pars in pé i panss avèk sa téi ansèrv tro bann tèr agrikol é téi raz la pinte manzé bonpé d’moun na pwin asé manzé pou ranpli zot boujaron-kaziman in milyar d’moun dsi la tèr… Alon mète luil par koté pou linstan pars néna dé shoz a dir épi roprosh pou fé. Alon parl l’éthanol… Zot i koné laba dann l’amérik épi dann Brésil bann loto i ansèrv in bonpé léthanol. Avèk kossa i fé sa ? Avèk kann, avèk bétrav sikriyèr, avèk lo blé épi avèk mayi - mi koné pa kossa zot i anpanss mé mwin sa i bote pa mwin pou lo rézon mwin la di an-o la.

Lé vré kann konm band léktèr Témoignages i koné, i fé bonpé zafèr avèk sa - lo sink san produi nou la fine anparlé é pa arienk in foi é anpliss sa pé ansèrv konm baz pou nout dévlopman indistriel. Mé fé l’ésanns avèk lo blé é avèk mayi, sa sé in n’afèr mi aprésyé pa bonpé par raporte konm mi di azot la fain dsi la tèr… Astèr par raporte léssans lo sipèréthanol néna bonpé zavantaz - Par égzanp i fane trépé d’CO2 dan l’èr, lo to l’octane lé pli for ké pou l’éssans pur,- donk in pli for randman pou lo motèr.- Pliss sana lé oir pou léssans lé moinss. I di ossi lo motèr i iz moinss. Solman la plipar d’tan I fo mète in boityé pou ansèrv in nouvo karbiran é sa I koute mil éro par la. In l’avantaz, lo pri vi k’i pèye pa la taks dossi é lo pri lé rante 49 épi 70 santime.

Mézami mi di azot dé-troi zafèr moin la antann-zot ossi zot i pé ékoute sa dsu Youtube - mé mi romark La Rényon néna kann, avèk kann i pé l’éthanol, é nou lé anrotar in foi anpliss. Pa arienk dsi L’amérik, lo Brézil, mé galman dsi la franss épi l’érop. Pou koué, Pars ni komand pa nou dopi la konvansyon la Fédékane-otroman di Virapoullé konm zot i koné.