Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

Dann la vi lo pli pire lé zamé sir mé li pé kante mèm arivé !

samdi 16 octob 2021, sanm Justin

Mézami, mi rapèl néna poin tro lontan néna in groupe l’avé désside rolanss la plantassyon friapin. Dann zot léspri lété pou rapèl demoune friapin la sov in bonpé d’moune dann la guèr trante nèf-karante sink. Pars dann tan-la issi nou lété pri avèk lo rézime Pétain é bande zanglé l’avé désside blok noute péi épi anpèsh bato akosté.

Momandoné issi la Rényon bande plantèr té oblizé arash kann, plante mayi avèk pistash, é si wi tyé in zanimo i fo wi déklar konmsa i koupe aou dsi oute bande tiké rassyoneman. Par issi demoune la plante galman maniok mé d’apré sak i paré maniok – dann tan-la téi soutien pa tro bien lo kor. Mon papa téi rakonte kan li téi sava travaye bitassyon, son janm téi flansh in pé pars solon li, li téi manke la forss.

Toussa i rèss a vérifyé, i rèss a kalkilé, é mwin la poin tro souvnir lo tan-la é si aprésa téi anparl ankor dann famiye, mwin la pa gingn zamé rokonstityé la vi dann tan-la dann mon koko. In shanson i rovien kant mèm, téi di : « Ayayaye, koute amwin zot toute, goni vid i tienbo pa d’boute. ». Mi rapèl ossi demoune téi di l’avé poin tro linze épi téi parl linz an goni, épi mèm in pé la rèss prèss tou ni in paké d’zané dan la guère.

Astèr oussa i lé toussa bande demoune l’avé zot konéssans dann tan la guèr. Mi panss zot la fine alé é lé tro tar pou sèye armète zot souvnir dann lo gou di zour. Lé tar galman, pa tro tar, pou nou tire bande lesson lo tan nou la passé dann la guèr-la. Pars mi kroi néna losson pou tiré, kansréti si lo tan lontan téi rovien in kou. Dann la vi i fo ou lé paré pars lo pli pire lé zamé sir, mé li pé kante mèm arivé. Alé : ni artrouv pli d’van.



Inn modékri, inn ti lavi, inn komantèr ?

signaler contenu


Facebook Twitter Linkedin Google plus