Oté

« Dann nout zassyète la santé épi la maladi lé mélanzé »

In kozman pou la rout

Justin / 9 zanvié 2021

JPEG - 43.6 ko

Médamm zé Méssyé, la sosyété, koz èk mwin sé koz èk in kouyon mé sé o pyé d’lo mir k’i oi lo masson. Mézami, kozman mwin la mark an-o la i kol pa ditou avèk sak in dénomé Paulin-zoinalyé dann tan dsi la tèr mon papa-téi di. Li téi di : lo ropo avèk la bone nouritir la zamé tyé pèrsone. I fo dir ropo li l’avé poin tro é la bone nouritir lété rar dann son pla émayé. Mi koné ankor in kozman k’i di : ni fouye nout tonm avèk nout kiyèr. Toussa-la pou dir si l’om i gnign pa vi v san manzé, néna dann manzé kékshoz va mine ali si la pa toutsuite talèr : tro d’sési, tro d’séla, pa assé d’si, pa assé d’la. Sé pou sa kan mi oi inmoun apré lir in létikète dann gran komèrs, mwin néna l’admirasyon pou li, mé o fon mi di li l’apré fé in akt manké, pars lo pli inportan lé possib lé pa marké dsi létikète-la é lo pli in portan sé ké l’om lé mortèl. Alor kalkil zot mèm é mi lèss azot lo tan pou sa. Ni rotrouv pli d’van. Sipétadyé.