Mézami zot i koné d’moune i yème pa i kontraryé azot, é kan zot i domande aou in n’afèr zot néna orère k’i di azot non. Poitan ni koné lo kozman kréol i di konmsa : domandé la pa intèrdi, rofizé la pa batu. Sa i vé dire kan wi domande in n’afèr néna déssèrtènn foi i pé di aou « oui », mé déssèrtènn foi i pé dir aou « non ». Sa lé dann la natire bande rolassyon dann la sossyété. Sa lé dann la natire imène galman.

Aprésa néna d’moune la boush lé tayé pou di “non”, é d’ote la boush lé tayé pou di « oui ». Si tèlman k’in zour mwin la suiv in formassyon pou aprande dire « non ». Mi panss formassyon-la la pa ansèrv amwin inn tyork, mé sa lé vré pou in bonpé formassion. Astèr zot i fé konm zot i vé : si lé dann zot natir pou dir « oui » mwn lé kaziman sir zot va kontinyé dir « oui », si zot lé tayé po dire « non » mwin lé kaziman sir zot va kontinyé dir « non ».

Alé ! Mi kite azot rofléshi la dsi é ni artrouv pli d’van. Sipétadyé.