Dann in métié d’mèr in komine, konm dann tout métié, nana déssèrtin foi ou i réissi sak ou i fé, mé na dé foi ou i réissi pa. Solman si ou la fé lo nésséssèr pou réissi sak ou l’apré fé, ou i pé rogard aou dan la glas, épi ou i di ou la poin arien pou arprosh aou. Sa lé déza bien.

Solman kank in zournal i fé in komantèr épi i di ou la gingn in klak, ou i konpran la doz la violans nana dann son kozman : finn’kont, i arprosh aou avoir gingn zéléksion kont in baron la droite.

Kan lo klak i transform an koud’pié dan la figuir, ou i konpran lo zournalis sé in voiyou, akoz nana arienk banna i flank koud’pié dann la figuir d’moun. Kan lo mark lé rouz, épi ou lé noir, ou i pé pa anpèsh aou mazine sak téi fé bann zésklav kan zot té i sava an maronaz. Alor, so klak, sansa so koud-pié, sansa so koud fèr sho, i fo prann ali avèk fièrté akoz l’onèr lé dann out kan.

Tan k’o zournal la fé sa, épi lo zournalis la ékri sa, l’onèr la pa son koté. Sèl shoz i atann ali, sé artouv son sanblab dann poubèl l’istoir.

Justin