Oté

Dann sistèm ékonomik ni koné, mèm l’or i shanj an sab

Justin / 30 out 2018

JPEG - 43.6 ko

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité si mi konpran bien, si i lès bann rouj fèr ébin zot i dévlop La Rényon. Ala mi oi z’ot konplèks kann i arlèv ankor in kou la ! Ala ké zot i kroi kann i pé sov La Rényon ankor zordi… Ma foi zot i rèv pars koué k’sé La Rényon par raport bann péi konm Brésil, La Thaïland, L’Ostrali épi tout bann péi gran prodiktèr kann san konté sak i plant bétrav. Arzout ankor bann péi l’afrik é lo tablo sar konplé. Koué k’sré nout kann san lo bann z’ède La Frans épi l’Erop ? Konbien lo tan banna i pé mète nout prodiksyon épi nout bann prodiktèr sou pèrfizyon ? Ziska k’in zour nora pi d’kann, pi d’plantèr, pi d’fasonyé épi va di : « Lo malad lé mor an bone santé ». Tok ! Pran sa pou toué !

Justin la fé pou répons :

Mon vyé matant k’i koz toultan la boush rouvèrt i étone pa moin ditou sak ou l’apré rakonté. Dizon ou i fé parti tout la bann i di konmsa : kann lé konm lo Kapri Hervé Villard, sa lé fini. An pliské sa i diré néna in bonpé d’moun konm ou la, i souète arienk in n’afèr, oir kann disparète dann téritoir La Rényon.
Moin pou mon par mi oi dé-troi z’afèr :
- Promyé z’afèr gouvèrnman la mète nout bann plantasyon dann in sityasion épi dann in sistèm i kondane azot pou disparète firamézir, la pa zordi pa domin mé pou disparète pars lo sistèm ékonomik kann, isi shé nou, lé mové.
- Dézyèm z’afèr kann épi bann sou-produi (plizyèr santène) néna in promèss d’avnir lé pa néglijab ditou, si néna in gro l’invéstisman dann la roshèrch. Malorozman la roshèrch la pa sifizan zordi é dopi in bon koup de tan.
- Troizyèm z’afèr pou trap in bon rézilta i fo in vré volonté politik par égzanp pou in dévlopman otosantré i koup lo pon avèk lo kolonyalis éoi lo néo. Pars, fransh vérité, dann in sistèm konm ni koné zordi lé pa sir néna tro zanbèk pou n ou avansé. Dann in sistèm ko nmsa, mèm l’por i shanj an sab.tok ! Pran sa pou ou !