Zot i koné in bon kafé, sa i doi zète triyé : kan ou i ramas ! Kan ou la fine ramasé galman pars lé riskab an avoir inn-dé grin lé pa bien mir, épi lé in pé tort-tort. Sof, mé li doi z’ète triyé ! Sé konmsa ké mi oi lé shoz ! Mé nout provèrb-la kosa sa i vé dir ozis ? La-dan na in késtyonn frékantasyon. Avan yèr, dann télé, té i parl Mitterrand in gran kourèr zipon dovan l’étèrnèl é moin té i kalkil provèrb moin la mark an-o la. Lo prézidan, anplis lo défin prézidan, pé pou son am ! té i triy pa késtyonn frékantasyon. Zot la pa bézoin in poin dsi in i ? Si ou i pran lo kontrèr, ou i di d’in moun nana triyaz dann son kafé, sa i vé dir li shoizi son moun, li shoizi son frékantasyon.

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète, tazantan, dakor rantre nou.