Matant Zélida la ékrir Justin :
Mon shèr nové, mon spèss salté, rouj-de-fon dopi l’étèrnité, zis pou takine aou in pé pou zordi. Ala mon moukataz : moin lé sir zot va dir zot la fine tir lo signal lalarm dopi lontan. Donk si bann gouvèrnman l’avé ékout azot dé shoz konm sak ni viv koméla noré pa arivé é si i ékout pa sak zot la fine di lo trikmardaz va ariv ankor in kou si pa domin, apré. Donk si mi konpran bien zot néna toultan rézon épi lé zot toultan tor. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, néna poin pli sour k’in moun i antan pa zorèye é i kontant ali dsa. Matant ou i koné nout parti i égzis pa solman dopi yèr. Li égzis dopi l’ané 1959 é dopi li lé éné li la toultan done l’alèrt.
In l’ansien, in bon dalon, té apré di amoin na poin lontan : l’ané 1959, apré an avoir fé in lanaliz la sityasion, nout parti la di shomin nou lété fine fé avèk la départmantalizasyon, é shomin nou téi sava fé té i pé pa pèrmète anou avans konm k’i fo dann shomin nout dévlopman. Zordi l’Insee i di La Rényon néna in sityasion atipik : kroisans san dévlopman. La pa in gran sosyé sak i di sa !
Donk nout bann kamarad l’avé rézon l’ané 1959 é mèm apré, é mèm zordi. Pou kosa nout parti l’avé é néna rézon ? Pars li rès dopi soisant zané bien atantif dsi lo sor nout pèp rényoné. Si vi romark matant nout parti la pa arète done l’alert é myé ksa : shak foi la sityasion té i rann obligatoir li la pran pozisyon.
Li la pran pozisyon épi li la fé bann propozisyon-in pé i di sa i apèl la kolaborasyon konm moin la lir sa kékpar !-mé sa sé inn krak pars nout parti la zamé propoz son kolaborasyon, an kontrèr li la touzour milite dann in sans antikolonyal. Mèm dann tan désèrtin i dékouv sa zordi l’avé ankor lo lé dann né !