Médam zé Méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami, koméla ankor mwin néna souvnans bazardier lontan. Sa téi sorte dann fon la rézèrv : in landroi prété par zozéforé pou plante léguime, dann fon lilète, épi téi dsande dann vilaz pou vande zot bazar. An diré mi rovoi ankor zot gran panyé téi ropoz dsi shombli krazé pou protèze zot tète é mi rapèl bien zot l’avé bézoin l’ède pou poz atèr konm pou romète dsi zot koko .

Pti marmaye mwin té i trouv sa éstra la fasson zot téi prézante zot léguime kissoi konkonm, kissoi kalbass, kissoi voèm, kissoi ankor d’ote shoz toute ossi zoli lé z’inn ké l’ote, é sirman toute ossi bon, é mwin téi priyèr Bondyé pou momon ashté é sirtou pa ranvoye azot san pran arien.

Lo tan la passé, toute sirman lé mor, é zot zanfan la pa roprande in travaye si difissil. Pétète zot i vande ankor bazar mé pi konm dann tan lontan, pi a la tète dann panyé tréssé é sirman apa konm dann tan mon souvnanss.

Alé ! Ni artrouv pli dvan sipétadyé.