Mézami ala in mo,kaloubadia, lé plito rar é i ansèrv prèss pa koméla. Pars si koméla marshandiz lé shèr zot lé pa rar, dann tan la guèr zot lété rar épi shèr an mèm tan, si tèlman gouvèrnèr téi done tiké pou ashté bande marshandiz rodinèr, konm la grèss, dori-mayi, savon é pi d’dote shoz ankor.

I prétan dir bande profitèr la ramass larzan dann kaloubadia,marshé noir, sirtou é mèm parfoi dann komèrss ilégal. Apré la guèr téi oi bande gro komèrs, bande gro loto, demoune bien friké par raporte zot la fé kaloubadia pou gonf zot pla.

Zot i diré koméla néna ankor kaloubadia ? Mi panss pa,antouléka i fo pa apèl lé shoz konmsa. Mé pétète lo tan lontan lé riskab rotourné. Kissa k’i koné.Alé ! mi kite azot rofléshi la dsi é ni rotrouv pli d’van.

Sipétadyé.