Oté

Dann tan-la téi apèl azot démokrate

Justin / 11 zwiyé 2018

JPEG - 43.6 ko

Moin la fine dir plis in foi dann tan la nou lété dann la diktatir kolonyal. D’in bout a l’ot la sosyété diktatir-la téi pèz dsi bann rényoné ; konm dann La Martinik téi pèz dsi bann martiniké, dann La Gwadloup téi pèz dési bann gwadloupéin, parèy pou la Guyane, pou la Nouvèl Kalédoni épi dann tout péi téi apèl bann konféti l’anpir.

Nou téi konète la frode dann zéléksyon, l’émigrasyon plizoumoins forsé, kontrol nout nésans, l’avortman épi tout kalité la réprésyon kisoi sosyal, kisoi ékonomik, kisoi kiltirèl. Lo laparèye d’éta téi pèz tout son fors dési nou avèk tout bann figaro konm bann malélu, épi bann nèrvis, mèm la rolizyon lété pou pèz dsi nou. Kan l’avé in moiyin pou fé la réprésyon téi ansèrv sa ziska la kord.

An fas kosa l’avé ? Sinploman nout kapasité pou fé la rézistans, pou sèye rann lo kou nou téi rosoi, épi kouraz pou siporté. Nout militan, mi oz dir, in bann éro : éro plantèr, éro zouvriyé, éro jenn, éro artizan, éro militan konbien la moizi dann bann prizon kolonyal... A ! L’avé galman bann démokrate révolté par sak nou rényoné nou téi doi siporté zour pou zour, moi pou moi, ané apré ané.

An prinsip zot lété pa militan dann nout parti mé zot téi aport zot konkour pou sèye fé avans la lite sinploman pou la démokrasi ; zot lété dann l’ADNOE (asosyasyon pou lo déroulman normal bann l’opérasyon zéléksyon). Zot téi sort isi shé nou é zot téi sort la-ba dan La Frans ménasé par lordonans oktob soisant, ménasé par bann nèrvis dann biro d’vote, ménasé par bann mèr frodèr, sirvéyé par z’ot l’administrasyon té i ézite pa pou di : noir, sansa blan, sé tout in bann nèg.

Inn an parmi i sort pass l’ot koté la vi. Pierre Gigord li téi apèl é bana la tap ali dann biro d’vote Sintandré. Mi souvien son foto lété dann promyé paz nout zournal Témoignages. Pierre, ou té in éro ! Ou té in zarboutan la démokrasi. Si l’avé in pantéon pou bann zarboutan lo pèp rényoné, lé sir nora trouv in plas de shoi pou mète aou.

Dann tan-la téi apèl azot démokrate é sa lé konm in tit noblès dann la lite zot la améné. Zamé, zamé, nou kapab obliyé.