Sa la pa in n’afèr i romont a yèr, pars fransh vérité sa té i éspas nana in bon koup de tan. Sak i rès dann Por zordi mi pans zot i rapèl pi tro koman la vil lété na in sinkantène d’ané. Dizon la vil té arienk in pti sirkonskripsyon, dizon santrovil koméla. Boi d’lé ? Sa té i mank pa. La savann ? Té i mank pa non pli. Shomin la pousyèr ? Parl pi. Mé l’avé galman in bann ti kour fré avèk zoli zoli flèr. Dsi l’kou d’sinkèr par la, in bann koshon noir sirman l’avé kass la port lo park té i bate in bon karé dan la komine konm si rien n’été, pou artourn z’ot poinn dépar dsi lo tar. Dann tan té konmsa ! Koméla lépi parèye ! Lo tan la vyann k’imarsh dan la komine. Mi lèss azot réfléshi la dsi é ni artrouv pli d’van sipétadyé.